Årsmelding 2010

Hordaland Husflidslag hadde pr. 31.12. som medlemmer:

Styret har i 2010 vore:

Leiar: Britt-Mari Gjerde, Fusa

Nestleiar: Brita Hekland, Bergen

Styremedlem: Karoline Blix, Austevoll

Styremedlem: Grethe Spurkeland, Nordhordland

1. varamedlem: Johanne Karin Årland, Austevoll

2. varamedlem: Åshild Orrebakken, Os

Fylkesoppnemnd: Guro Fosse Haraldsen, Bergen

Fylkesoppnemnde varamedlem: Jorunn Gjersvik, Straume

Kultur og næringskonsulent: Janniche Ryssdalsnes

Styremøte / studiering:

Styret har vore samla til 9 styremøte. Delar av kvart styremøte har vore køyrt som studiering utan lærar, med tema: Organisasjonsarbeid – barn og unge og 100 års markeringa i organisasjonen. Målet var å gjennomføra planar for aktivitetar i fylkeslaget med tanke på barn og unge og aktivitetar i tilknyting til 100 års markeringa til organisasjonen. Fleire av planane er utførde. Handverksteknikkar er praktisert med tanke på kurs og å auka kompetansen i organisasjonsarbeid for deltakarane i samsvar med strategisk plan for Norges Husflidslag og utarbeidd og gjennomført planar der barn var i fokus i organisasjonen. Siste styremøte vart avlyst grunna flytting av kontoret.

Arbeidsutvalmøte:

Det har ikkje vore arbeidsutvalmøte dette året. Heile styret var samla på årsmøte i vår og på medarbeidarkurset i haust. Sekretær og konsulent har hatt god kontakt og mange møter dette året.

Folkekulturforbundet (FOLK) i Hordaland, styremøte og årsmøte:

Sekretæren i H.H. Torild F. Velure sit som leiar i FOLK i Hordaland. Resten av styret i FOLK er: leiar i H.H., ein representant frå Fylkeskystlaget, Hordaland Mållag, Hordaland Ungdomslag og Vestlandske Teaterlag. Rekneskapet til FOLK vert ført i vår balanserekneskap.

Det vart vedteke på årsmøte til FOLK i 1999, at overskotet skal overførast til H.H. som "løn" for jobben med å vera leiar for FOLK i Hordaland.

Årsmøte 2010 vart avvikla berre ved utsending av rapport om økonomien og tidlegare vedtak i styret. Det kom ikkje tilbakemelding på dette frå styremedlemane og etter vedtak frå 1999 vert overskotet for 2009 på kr. 3050,50 overført til Hordaland Husflidslag.

Overskotet til FOLK for 2010 som er teke med i vår balanserekneskap er på kr.4000,-.

Styret i FOLK Hordaland avgjer om det vert same utfall som tidlegare på denne saka på sitt årsmøte våren 2011.

Leiar T. Velure representerte FOLK på årsmøtet til Vofo i mai. Ho har også hatt info om FOLK på tekstil- og matstudiet på Vestnorsk kulturakademi på Voss i mars.

Voksenoppleringsforbundet (Vofo):

Studieforbundet FOLK er medlem av Vofo (Voksenoppleringsforbundet) i Hordaland. Leiar i FOLK Hordaland, Torild F. Velure, er valt inn som medlem til styret i Vofo Hordaland. Ho har møtt på 6 styremøte og årsmøte i Bergen. I februar deltok ho på ein dagskonferanse i Bergen. Tema var orientering om organisasjonen VOFO for medlemslaga. 6 lokallag møtte med 8 utsendingar.

Styremøte i desember var på vårt kontor.

Brita Hekland var utsending for Hordaland Husflidslag på årsmøte til Vofo.

Vestnorsk Kulturakademi:

Torild F. Velure er Hordaland Husflidslag sin representant i styret til Vestnorske Kulturakademi på Tvildemoen på Voss. Ho har vore på 4 styremøte i 2010, 3 av møta har vore i Bergen. I mars hadde ho eit foredrag m/demonstrasjon i toving på tekstilstudiet. Studia ved akademiet er godkjende som studie på høgskulenivå i FOLK.

Velure er VKA sin representant i styret for Magasinet (kunstnarverkstad) på Tvildemoen. Her har ho møtt på eit styremøte i haust.

Kulturminnedagen 2010, sjå eige punkt.

Hordaland Barne- og Ungdomsråd:

H.H. er medlem av Hordaland Barne- og ungdomsråd (HBUR). HBUR er barne og ungdomsorganisasjonens talerøyr og høyringsorgan i høve til fylkeskommunen i spørsmål som har tilknyting til barn og unge. HBUR innstiller og fordeler driftsstøtte til barne- og ungdomsorganisasjonane i Hordaland. For å søkja om midlar, må vi ha over 50 barnemedlemar under 26 år.

Brita Hekland og Grethe Spurkeland var utsending til årsmøte i HBUR 21. februar 2010 på Bergen Airport Hotell.

I 2010 fekk vi kr. 3.500,- i støtte gjennom Kontingentfondet i HBUR til barneaktiviteten vi hadde på Handverksmessa i Jondal i juni.

27.mars: Generalforsamling for Husfliden Bergen as:

H.H. og Sogn og Fjordane Husflidslag eig kvar 250 aksjar á kr.1.000,- i Husfliden Bergen as..

H.H. har også 27 lånebrev til ein verdi på til saman kr.13.500,- i Husfliden Bergen as. Generalforsamlinga var i Husfliden sine lokale i Bergen. Sekretæren møtte for leiar.

Styrerepresentantar for 2010: Hordaland: Dagrun Waag Linchausen, Anne Grete Istad og Laila Person Haugland. Sogn og Fjordane: Norunn B. Hjellbrekke og Kari Larsen. Tilsettes representant: Grethe Johanne Lerø. Dagrun Waag Linchausen tok attval som styreleiar.

Valkomité for 2010: er fylkesleiarane i Hordaland og Sogn og Fjordane Husflidslag saman med styremedlem Kari Larsen frå Sogn og Fjordane..

Det vart vedteke at dei to aksjonærane skulle få kr. 5.000,- kvar i utbyte for 2010.

19.-21. mars: Årsmøtet på Bjørnefjorden Gjestetun i Os:

H.H. hadde årsmøte på Bjørnefjorden Gjestetun i Os helga 19.-21. mars 2010 invitert av Os Husflidslag som hadde 70 års jubileum. Leiar i Norges Husflidslag Vibeke Mohr var invitert gjest denne helga. N.H. spanderte ”kvit dame” på oss i høve jubileet.

Av 50 utsendingar hadde 43 stemmerett. 19 lokale lag var representerte av 22 (24). Det var ikkje utsending frå Eidfjord, Fitjar og Ullensvang. (Kvam og Øygarden ikkje aktive).

Årsmøtet vart opna av ordførar i Os Kommune, Terje Søviknes. Britt-Mari Hesjedal, Fusa vart gjenvalt som leiar.

I høve 100 års jubileet til N.H. fekk alle dei 24 lokallaga ei jubileumsgåve frå fylkeslaget. Det var ein reparbane (snordreiar) for barn, med ynskje om at den vart flittig brukt i laget.

Rammeutstillinga der alle lokallag hadde presentert seg på kvar si ramme, vart utstilt for fyrste gong denne helga. Vi besøkte Oselvarverkstaden (Economuseum), Galleri Oz og Yrkjestova til Os Husflidslag. Her var det utstilling av arbeid frå barnas arbeidsstove og foredrag om Os bunaden og arbeidet til bunadsnemnda deira.

Om kvelden inviterte Os Husflidslag til festmiddag i bunad i høve 70 års jubileet.

Vi hadde medarbeidarsamling same helga med tema fotvev.

Jubileumsutstillinga (rammeutstillinga til lokallaga).

I desember 2009 fekk alle lokallaga utlevert kvar si ramme på 46 x 85 cm eller 30 x 85 cm. Rammene var gjenbruk frå fylkeslaget og konsulenten sitt lager. Lokallaga fekk fritt spelerom til og presentera laget sitt på ramma. 20 lokallag deltok. Både info, bilde og modellar i miniatyr og full storleik vart montert på rammene og det vart ei flott utstilling.

Seinare vart rammene stilt ut på Husfliden Bergen as i to omgangar. Dei 10 fyrste frå 23.april og ut til byrjinga av juli og dei andre 10 hang fram til 24.august. Deretter vart utstillinga vist på Vestnorsk Kulturakademi på Voss frå 11.september til 22.oktober. Rammeutstillinga vart også vist under Hordaland Fylkeskommune sin Kultur og idrettskonferanse 10.-11.november. Etter denne tid har laga fått rammene tilbake til si eiga.

24.april: Årsmøte til Hordaland Folkeakademi.

Brita Hekland var vår utsending til årsmøtet som var på Grand Hotell Terminus i Bergen.

27.-29.mai: Jubileumsmarkering på og utanfor Husfliden Bergen as.

Tekstildagar i og utanfor Husfliden Bergen as i samarbeid med Sogn og Fjordane Husflidslag og husflidskonsulenten/ kultur- og næringskonsulenten i begge fylka.

Torsdag var strikkedag. Her var bl.a. ei lita innvandrargruppe frå ”2gether” deltakarar. Denne dagen deltok berre vårt fylkeslag saman med kultur- og næringkonsulenten vår.

Fredag var det aktivitetar for born og unge. Ein 3.klasse med 23 elevar frå Christi Krybbe skule var inviterte til aktivitet i 1,5 t. Elles var det mange barn og vaksne som deltok på aktivitetane: laging av hoppetau på reparbane, snorer på slyngestokkar og snorer i teknikken Kumi Himo.

Laurdagen var det pynting av 8 kronebrurer utanfor Husfliden. Desse kronebrurene vart vist: Fana (Erdal), Osterøy (Reigstad), Voss, Austevoll, Strandebarm, Nordhordland, Luster og Jølster. Dette vart ei flott jubileumsmarkering som også turistane sette pris på. Det var også demonstrasjon av veving på grind og fletting og påknyting av sokkeband for menn.

Aktivitetane fekk god pressedekking i avisene og brudepyntinga hadde mykje publikum. Magasinet Bunad hadde ein fin bildereportasje i nr.3-2010.

26. mai: Barnas Festspel.

I saman med kultur- og næringskonsulenten spikka vi seljefløyter utanfor Husfliden Bergen as. Sidan det var streik i enkelte barnehagar, var det mange born som fekk seg seljefløyte denne dagen. Dette er eit årleg tiltak som vi har delteke på sidan 2003.

10.juni og 29.-31.oktober: Fylkesleiar og sekretærmøte i Norges Husflidslag:

Fylkesleiar og sekretær møte var i Oslo i førekant av Landstinget. Tema for møtet var landsmøtesakene og at leiar i N.H. hadde trekt seg frå stillinga. Leiar og sekretær møtte.

Fylkesleiar- og sekretærmøte i oktober var i Stavanger. Nestleiar og sekretær møtte. Tema var den nye strategiske plan for NH og prosjektarbeid. Vi fekk læra og spinna på sjølvspikka krok.

11.-13.juni: Landsting Norges Husflidslag.

Utsendingar til landstinget var leiar, nestleiar Brita Hekland, Karoline Blix og sekretæren. For å få mest ut av pengane, reiste vi med tog og overnatta på eit rimeleg hotell.

Laurdag deltok utsendingane våre saman med kultur- og næringskonsulenten i aktivitetar for barn i Spikersuppa i Oslo. Teknikken var snorer laga med slyngestokkar. Det var stor aktivitet rundt vår stand. Sekretæren var også vakt på utstillinga til Husflidshandverkarane.

Utsendingane var med på bunadsparade, besøkte Operaen, fekk sjå mange fine jubileumsutstillingar og var gjester hjå ordførar Fabian Stang i Oslo Rådhus, der vi og hadde omvisning.

På festmiddagen laurdag hadde vi NH sin høgaste beskyttar, Dronning Sonja som gjest.

Utsendingane deltok ikkje på utflukt søndag.

25.-26.juni: Handverksmessa i Jondal

Leiar i Hordaland Husflidslag Britt-Mari Gjerde stod for den offisielle opninga av handverksmessa i Jondal fredag 24.juni. Karoline Blix, Else Marie Finnkirk og leiar i Hordaland Husflidslag saman med kultur- og næringskonsulenten var med i juryen for ”Diplom for godt arbeid” frå Noregs Husflidslag. Ein verdig vinnar av utmerkinga vart Dreiebuo i Rosendal v/ Knut Riise.

Laurdag hadde vi aktivitetsdag for barn. Det vart laga mange hoppetau på reparbane og snorer på slyngestokkar. Stor aktivitet heile dagen der 3 frå styre og Else Marie Finnkirk saman med konsulenten var medhjelparar.

Vi hadde fått kr 3.500,- frå Kontingentfondet i HBUR til denne aktiviteten.

12.september: Kulturminnedagen.

Kulturminnedagen hadde i år tema ”Nytt liv i gamle minner”. H.H. var initiativtakar og program for dagen vart utarbeidd i saman med Vestnorsk kulturakademi (stiftelse der desse er representerte: Universitetet i Bergen, Høgskulen i Bergen, Voss Kommune, Hordaland Fylkeskommune, kulturavdeling, Fylkesmannen i Hordaland) Dagen vart arrangert i samarbeid med: Voss Husflidslag, Voss Bygdekvinnelag, Fortidsminneforreninga (Finneloftet), Voss kulturskule, kunsthandverkarar i ”Magasinet” og Norges Husflidslag v/ kultur og næringskonsulenten. Det vart ei flott markering på Tvildemoen denne dagen. Her vart både den materielle og immaterielle kulturarven sett i fokus med utgangspunkt i dei tre studia som akademiet tilbyr; mat, byggeskikk og tekstil. Likeeins vart det aktivitetar for barn i desse tre greinene også. Heile programmet ligg på www.kulturminnedagen.net og på fylkeslaget si nettside www.husflid.no . Det var søknadfrist i midten av juni, for å vera med i konkurransen om å ha det beste programmet for dagen. Vi sende inn og Vi vann årets Kulturminnedag på landsplan! Kr 30.000,- vart fordelt mellom dei laga som hadde vore med frå starten av. Dagleg leiar i Kulturminnedagen Torveig Dahl og koordinator for dagen Unni B. Walhoft var tilstades heile dagen. Talen til leiaren ligg på vår nettside. Likeeins pressemelding om dagen frå miljø- og utviklingsminister Erik Solheim.

Takk til Friele og Toro for sponsing av kaffi og vaffelrøre. Trass i eit frykteleg regnvêr mest heile dagen, vart det ein flott dag for kulturen.

15.-16. Oktober: Medarbeidarkurs i Bergen.

Vi hadde medarbeidarkurs med tema ”Bruk av websidene til lokallaga” i AOF sine lokalar, med overnatting på Hotell Neptun i Bergen. Kurset var gratis for lokallaga. 7 lag deltok med 14 deltakarar. Fylkeslaget stilte med 5 frå styret, sekretær og konsulenten var med. Kristoffer Oftedal frå N.H. var kursleiar. Det var eit godt kurs der ein kan sjå resultata på nettsidene til lokallaga som deltok. Kveldsaktiviteten var strikking i teknikken moebius som Åshild Orrebakken leia.

10.-11.november: Hordaland Fylkeskulturkonferanse i Bergen.

I år var både Kultur- og idretts-konferansen til Hordaland fylke samtidig, med delvis felles program. Utsendingane var: Grethe Spurkeland, Åshild Orrebakken og sekretæren. Der møte var delt, deltok vi på programmet for musea. Strategisk plan med gruppearbeid var via ein del av fellesprogrammet.

Rammeutstillinga vår vart vist i møtesalen begge dagane.

Andre møter:

Sekretæren har vore på eit dagsmøte med Hordaland Fylkeskommune, næringsavd. i saman med kultur- og næringskonsulenten i høve fylkestilskotet til stillinga. Leiar i Regionssenter for husflidsnæring var også med. Her fekk vi og orientering om deira arbeid med Economusee /Craft international prosjekt. Saman med kultur og næringskonsulenten og Regionssenter for husflid har vi underskrive ein samarbeidsavtale om å vera med på det vidare utviklingsarbeidet for slike musé/prosjekt.

Desember: Flytting av kontor.

Det var kome nye leigetakarar i Holmedalsgården 3 og desse ville ha meir og meir plass. Sekretæren følte at vi stod i fare for å verta oppsagde frå kontoret. Grunna innskrenka rettar som leigetakar, tap av lagerplass på gangen og auka husleige m/straum, flytte vi til nye kontorlokalar på 40kvm i Bredsgården 2 2.etg. Vi fekk leiga dette frå 15.desember og vi sa difor opp leigeavtalen i Holmedalsgården 3. Sekretæren pakka alt på kontoret i passande emballasje og laurdag 18.desember vart det dugnad med 3 innleigde frå Ung jobb, 3 frå styret, 2 frå lokallaga og sekretær med son. Flyttelassa gjekk med handkjerre til midt på framsida av Bryggen. Veka føre jol, joleveka og starten på nyttåret brukte sekretæren til å mala, montera, rydda og koma i orden på det nye kontoret. Ny adresse er: Bryggen 33, Bredsgården 2. 5003 Bergen. Velkomen opp!

Oppsummering.

Det var svært gledeleg med auke i tilskotet frå Hordaland Fylke, kulturavdelinga. Dette har gjort at vi har kunna setja i gang tiltak og aktivitetar utan og verta avgrensa grunna økonomien.

I jubileumsåret har vi hatt mange aktivitetsdagar med vellukka gjennomføring. Høgdepunktet forutan ekstratilskotet, var vel å vinna årets Kulturminnedag. Dette gav meirsmak og lønn for strevet! Kronebrurene som vart pynta utanfor Husfliden i mai, vart vel den hendinga som gav best pressedekking.

Styret og sekretær takkar kultur- og næringskonsulent Janniche Ryssdalsnes for godt samarbeid dette året.

Vi takkar Noregs Husflidslag, Husfliden Bergen as, Vestnorsk Kulturakademi og ikkje minst alle lokallaga våre for godt samarbeid. FOLK og HBUR vil vi takka for både tilskot og godt samarbeid.

På nettsidene våre www.husflid.no har vi lagt ut foto og info om alle aktivitetane vi har hatt dette året.

Styret i H.H. vil retta ein særs takk til Hordaland Fylke, kulturavdelinga for økonomisk støtte og for godt samarbeid i året som har gått.

Hordaland Husflidslag

Bergen 2011.

Britt-Mari Gjerde (s) leiar, Brita Hekland (s) nestleiar, Karoline Blix (s)styremedlem

Grethe Spurkeland (s) styremedlem, Guro Fosse Haraldsen (s) fylkesoppnemnd styremedlem